మిడ్జిల్, జూలై 9 (7టీవీ ఫోకస్): విద్యార్థులు చదువుతో పాటు దేశభక్తి, సామాజిక బాధ్యత, నాయకత్వ లక్షణాలను పెంపొందించుకోవాలని ఏబీవీపీ పూర్వ నాయకుడు పల్లె తిరుపతి అన్నారు. విద్యార్థుల హక్కులు, నాణ్యమైన విద్య, ఉపాధి అవకాశాల కోసం ఏబీవీపీ ఉద్యమాలను మరింత బలోపేతం చేయాలని పిలుపునిచ్చారు. అఖిల భారతీయ విద్యార్థి పరిషత్ (ఏబీవీపీ) ఆవిర్భావ దినోత్సవాన్ని పురస్కరించుకుని మిడ్జిల్ శాఖ ఆధ్వర్యంలో జెండా ఆవిష్కరణ కార్యక్రమం నిర్వహించారు. ఈ కార్యక్రమానికి ముఖ్య అతిథిగా హాజరైన ఏబీవీపీ పూర్వ నాయకుడు పల్లె తిరుపతి విద్యార్థులను ఉద్దేశించి ప్రసంగించారు. ఈ సందర్భంగా ఆయన మాట్లాడుతూ, విద్యార్థులు కేవలం చదువుకే పరిమితం కాకుండా దేశభక్తి, సామాజిక స్పృహ, జాతీయ భావాలను పెంపొందించుకోవాలని సూచించారు. రేపటి సమాజానికి దిశానిర్దేశం చేసే శక్తి విద్యార్థుల్లోనే ఉందని, విద్యార్థి దశ నుంచే నాయకత్వ లక్షణాలు అలవర్చుకుని సమాజంలోని సమస్యలపై స్పందించాలని పిలుపునిచ్చారు. విద్యా వ్యవస్థలోని లోపాలను ప్రశ్నిస్తూ ప్రభుత్వ విద్యాసంస్థల్లో మౌలిక సదుపాయాల కల్పన, అధ్యాపకుల ఖాళీల భర్తీ, పేద విద్యార్థులకు నాణ్యమైన విద్య అందేలా ఉద్యమాలు కొనసాగించాలని పేర్కొన్నారు. అలాగే ప్రైవేట్ విద్యాసంస్థల్లో అధిక ఫీజులను నియంత్రించడం, ఫీజు రీయింబర్స్‌మెంట్, స్కాలర్‌షిప్‌లను సకాలంలో అందించడం, యువతకు ఉద్యోగ అవకాశాల కోసం పారదర్శక నియామక ప్రక్రియ చేపట్టాలని ప్రభుత్వాలను డిమాండ్ చేశారు. పాఠశాలలు, కళాశాలల్లో డ్రగ్స్, ఇతర వ్యసనాల నిర్మూలనకు విద్యార్థులను చైతన్యపరచడంతో పాటు నైతిక విలువలతో కూడిన విద్యను ప్రోత్సహించాలని ఆయన సూచించారు. ఏబీవీపీ కేవలం విద్యార్థి సంఘం మాత్రమే కాదని, సంస్కారవంతమైన సమాజ నిర్మాణానికి కృషి చేసే సంస్థ అని పేర్కొన్నారు. విద్యార్థుల హక్కులు, దేశ ప్రయోజనాల కోసం ఏబీవీపీ కార్యకర్తలు మరింత చురుకుగా ఉద్యమించాలని పిలుపునిచ్చారు. ఈ కార్యక్రమంలో ఏబీవీపీ రాష్ట్ర కార్యవర్గ సభ్యుడు కురుమూర్తి, మండల నాయకులు నవీన్, అరుణ్ కుమార్, మణికాంత్, శివ ప్రసాద్, సిద్ధు, సాయి, శివ, రమేష్తో పాటు కళాశాల విద్యార్థులు, విద్యార్థినులు పాల్గొన్నారు.
About the Author
