అధికార పార్టీ నాయకుల అండతో రెచ్చిపోతున్న భూబకాసురులు.. సైనికుడి ప్లాట్‌తో సహా 13 ఎకరాలు కబ్జా!

రంగారెడ్డి జిల్లా నందిగామ మండల కేంద్రంలో బడా చోర్ల దందా వేణుగోపాల్ నగర్ వెంచర్‌లో యథేచ్ఛగా సాగుతున్న భూ ఆక్రమణలు*

దాదాపు 100 నుండి 200 ప్లాట్లు కబ్జా గురైనట్లు బాధితుల ఆవేదన న్యాయం చేయాలంటూ

7 టివి ఫోకస్ షాద్ నగర్ జులై03: నందిగామ (రంగారెడ్డిజిల్లా): అధికార పార్టీకి చెందిన కొంతమంది ముఖ్య నాయకుల అండదండలతో రంగారెడ్డి జిల్లా నందిగామ మండల కేంద్రంలో భూమాఫియా రెచ్చిపోతోంది. దేశ సరిహద్దుల్లో ప్రాణాలను పణంగా పెట్టి సేవ చేస్తున్న ఒక సైనికుడి ప్లాటుతో పాటు, సుమారు 13 ఎకరాల విస్తీర్ణంలోని వందలాది ప్లాట్లను బడా చోర్లు యథేచ్ఛగా కబ్జాకు పాల్పడటం స్థానికంగా తీవ్ర కలకలం రేపుతోంది.

20 ఏళ్ల క్రితం నాటి వెంచర్.. ఇప్పుడు కబ్జాదారుల హస్తగతం!

బాధితులు మరియు స్థానికులు తెలిపిన వివరాల ప్రకారం.. నందిగామ మండల కేంద్రంలో గల “వేణుగోపాల్ నగర్ వెంచర్” లో 2002 సంవత్సరం నుండి 2006 వరకు కీర్తిశేషులు మేకల వేణుగోపాల్ రెడ్డి కొంతమంది రైతులు, ఇతర భూస్వాముల నుండి భూమిని సేకరించారు. సర్వే నెంబర్లు: 1584, 1585, 1591, 1592, 1593, 1594, 1595, 1596, 1597, 1615, 1616, 1617, 1618, 1619, 1620, 1621, 1622, 1623, 1627, 1644, 1645, 1646 లలోని భూమిని పలు దఫాలుగా అభివృద్ధి పరిచి వేణుగోపాల్ నగర్ వెంచర్‌గా ఏర్పాటు చేశారు.
ఈ వెంచర్ నుండి 2002 నుండి 2006 మధ్య కాలంలో ఎంతోమంది మధ్యతరగతి ప్రజలు, కష్టపడి సంపాదించుకున్న సొమ్ముతో షాద్ నగర్ సబ్ రిజిస్ట్రార్ కార్యాలయం ద్వారా చట్టబద్ధంగా ప్లాట్లను రిజిస్ట్రేషన్ చేయించుకున్నారు. గత 20 సంవత్సరాలుగా ఆయా ప్లాట్లు వారి ఆధీనంలోనే ఉన్నాయి. రాజకీయ అండతోనే ఈ దౌర్జన్యం:
ప్రస్తుతం అధికార పార్టీకి చెందిన కొంతమంది ముఖ్య నేతల ఆశీస్సులు ఉండటంతో, స్థానిక భూబకాసురులు కళ్ళు మూసుకుపోయి ప్రవర్తిస్తున్నారు. అమాయక ప్రజల భూములపై కన్నేసి, దాదాపు 13 ఎకరాల విస్తీర్ణంలో ఉన్న సుమారు 100 నుండి 200 ప్లాట్లను అక్రమంగా కబ్జా చేశారు. దేశ రక్షణలో ఉన్న ఒక సైనికుడి ప్లాట్‌ను సైతం వదలకుండా ఆక్రమించుకోవడం వీరి దౌర్జన్యానికి పరాకాష్టగా నిలిచింది.బాధితుల ఆవేదన:
“మేము కష్టపడి సంపాదించిన డబ్బుతో, అన్ని చట్టపరమైన నిబంధనల ప్రకారం రిజిస్ట్రేషన్ చేయించుకున్న ప్లాట్లను ఈరోజు రాజకీయ బలంతో దౌర్జన్యంగా లాక్కుంటున్నారు. ప్రశ్నిస్తే బెదిరింపులకు దిగుతున్నారు. అధికారులు స్పందించి మా భూములను మాకు దక్కేలా చేయాలి.”శాంతిభద్రతలను కాపాడాల్సిన ప్రజాప్రతినిధులు, ప్రభుత్వ పెద్దలు ఈ కబ్జాదారుల వెనుక ఉండి నడిపిస్తుండటంతో బాధితులు దిక్కుతోచని స్థితిలో కొట్టుమిట్టాడుతున్నారు. ఈ భూ అక్రమాలపై ఉన్నతాధికారులు తక్షణమే విచారణ జరిపి, కబ్జాదారులపై కఠిన చర్యలు తీసుకోవాలని, బాధితులకు న్యాయం చేయాలని స్థానికులు, ప్లాట్ల యజమానులు డిమాండ్ చేస్తున్నారు.