7టీవీ ఫోకస్, హైదరాబాద్, జూన్ 4:
రాష్ట్ర రాజకీయాల్లో గురువారం బీఆర్ఎస్ దూకుడు పెంచింది. భూముల మార్కెట్ విలువల పెంపు నిర్ణయాన్ని ప్రజలపై ఆర్థిక భారం మోపే చర్యగా అభివర్ణించిన ఆ పార్టీ నేతలు, కాంగ్రెస్ ప్రభుత్వంపై తీవ్ర విమర్శలు గుప్పించారు. వర్కింగ్ ప్రెసిడెంట్ కేటీఆర్ నేతృత్వంలో జరిగిన వివిధ సమావేశాలు, మీడియా సమావేశాల్లో ప్రభుత్వ విధానాలపై బీఆర్ఎస్ ఎదురుదాడి చేసింది.
“ఇప్పుడు ఎన్నికలు జరిగినా బీఆర్ఎస్ 90 స్థానాల్లో విజయం సాధిస్తుంది. ముఖ్యమంత్రి రేవంత్ రెడ్డికి ధైర్యం ఉంటే అసెంబ్లీని రద్దు చేసి ప్రజల తీర్పు కోరాలి” అని కేటీఆర్ సవాల్ విసిరారు. తెలంగాణ ఉద్యమ చరిత్రను గుర్తు చేస్తూ, దేశభక్తిపై తమకు ఎవరూ పాఠాలు చెప్పాల్సిన అవసరం లేదని స్పష్టం చేశారు.
ధాన్యం కొనుగోళ్లు, ఓటర్ల జాబితా ప్రత్యేక సవరణ, భూముల విలువల పెంపు, అక్రమ కేసుల నమోదు వంటి అంశాలపై మాజీ మంత్రులు ఎర్రబెల్లి దయాకర్‌రావు, జగదీశ్ రెడ్డి, నిరంజన్ రెడ్డి తదితరులు ప్రభుత్వాన్ని నిలదీశారు. మరోవైపు ఈ నెల 6న మలేషియాలో నిర్వహించే తెలంగాణ ఆవిర్భావ వేడుకలకు కేటీఆర్ హాజరుకానున్నట్లు పార్టీ వర్గాలు వెల్లడించాయి.
ప్రభుత్వ వైఫల్యాలపై ప్రజల్లో అసంతృప్తి పెరుగుతోందని, రానున్న రోజుల్లో ప్రజా సమస్యలపై మరింత దూకుడుగా పోరాటాలు నిర్వహిస్తామని బీఆర్ఎస్ నేతలు ప్రకటించారు.
About the Author
