కుటుంబ సభ్యులను పరామర్శించిన కేటీఆర్
బీఆర్ఎస్ పార్టీ అండగా ఉంటుందని భరోసా
హైదరాబాద్, జూన్ 23 (7టీవీ ఫోకస్ ప్రతినిధి): తెలంగాణ ఉద్యమకారుడు, బీఆర్ఎస్ సీనియర్ నాయకుడు గొట్టిముక్కల పద్మారావు అకాల మరణం పట్ల బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర దిగ్భ్రాంతి వ్యక్తం చేశారు. మంగళవారం కూకట్‌పల్లిలోని పద్మారావు నివాసానికి వెళ్లిన కేటీఆర్, ఆయన చిత్రపటానికి పూలమాల వేసి నివాళులర్పించారు. అనంతరం కుటుంబ సభ్యులను పరామర్శించి ప్రగాఢ సానుభూతి తెలిపారు. ఈ సందర్భంగా కేటీఆర్ మాట్లాడుతూ, తెలంగాణ రాష్ట్ర సాధన ఉద్యమంలో గొట్టిముక్కల పద్మారావు కీలక పాత్ర పోషించారని గుర్తు చేశారు. ఉద్యమ స్ఫూర్తిని ప్రజల్లోకి తీసుకెళ్లడంలో, పార్టీ బలోపేతంలో ఆయన చేసిన కృషి ఎప్పటికీ మరువలేనిదని అన్నారు. తెలంగాణ సమాజం కోసం, ప్రజా సమస్యల పరిష్కారం కోసం ఆయన చేసిన సేవలు చిరస్మరణీయంగా నిలుస్తాయని పేర్కొన్నారు. పద్మారావు మరణం పార్టీకి, ఉద్యమ శ్రేణులకు తీరని లోటని కేటీఆర్ ఆవేదన వ్యక్తం చేశారు. ఈ క్లిష్ట సమయంలో కుటుంబ సభ్యులు ధైర్యంగా ఉండాలని సూచిస్తూ, బీఆర్ఎస్ పార్టీ అన్ని వేళలా వారికి అండగా నిలుస్తుందని భరోసా కల్పించారు. తెలంగాణ ఉద్యమంలో పద్మారావు చూపిన నిబద్ధత, పార్టీ పట్ల ఆయనకున్న అంకితభావం యువతకు ఆదర్శంగా నిలుస్తుందని కేటీఆర్ పేర్కొన్నారు. ఉద్యమ నాయకుడిగా, ప్రజల మనిషిగా ఆయన సంపాదించుకున్న గౌరవం ఎప్పటికీ నిలిచిపోతుందని అన్నారు. ఈ పరామర్శ కార్యక్రమంలో కూకట్‌పల్లి ఎమ్మెల్యే మాధవరం కృష్ణారావు, కుత్బుల్లాపూర్ ఎమ్మెల్యే కేపీ వివేకానంద్, ఎమ్మెల్సీ శంభీపూర్ రాజు నవీన్ కుమార్ రావు, పార్టీ నాయకులు, కార్యకర్తలు పాల్గొని గొట్టిముక్కల పద్మారావుకు నివాళులర్పించారు.
About the Author
