రహదారి మూసివేతతో స్థానికులకు తీవ్ర ఇబ్బందులు

మార్గం పునరుద్ధరించాలని హైడ్రాకు వినతి ..

7టీవీ ఫోకస్, హైదరాబాద్, జూన్ 23: రహదారి మూసివేత కారణంగా రోజువారీ రాకపోకలు తీవ్రంగా దెబ్బతింటున్నాయని, వెంటనే ప్రత్యామ్నాయ చర్యలు చేపట్టి మార్గాన్ని అందుబాటులోకి తీసుకురావాలని జీపీఆర్ లేఅవుట్ వాసులు హైడ్రా అధికారులను కోరారు. ఈ మేరకు హైడ్రా కమిషనర్ ఏ.వి. రంగనాథ్‌కు స్థానికులు ఫిర్యాదు చేశారు. స్థానికుల కథనం ప్రకారం, జీపీఆర్ లేఅవుట్‌కు సంబంధించిన సర్వే నంబర్లు 51, 52 నుంచి ప్రధాన రహదారికి అనుసంధానంగా ఉన్న మార్గం ద్వారా అనేక కుటుంబాలు రాకపోకలు సాగిస్తున్నాయి. అదే మార్గంలో విద్యుత్ స్తంభాలు, ట్రాన్స్‌ఫార్మర్, 33 కేవీ హైటెన్షన్ విద్యుత్ లైన్ కూడా ఉన్నాయని వారు తెలిపారు. ఈ ప్రాంతంలో ఇప్పటికే పలు నివాస గృహాలు నిర్మాణమై ఉండగా, దాదాపు 30 నుంచి 40 కుటుంబాలు ఆ మార్గంపైనే ఆధారపడి జీవనం సాగిస్తున్నాయని పేర్కొన్నారు. అయితే సర్వే నంబర్లు 51, 52కు సంబంధించిన కొన్ని ప్లాట్లు ప్రస్తుతం న్యాయపరమైన వివాదాల కారణంగా ‘స్టేటస్ కో’ పరిధిలో ఉన్నాయని, దీనివల్ల ప్రధాన రహదారికి వెళ్లే మార్గం మూసుకుపోయినట్లు స్థానికులు తెలిపారు. దీంతో తమకు ప్రత్యక్షంగా అందుబాటులో ఉన్న మార్గం లేకపోవడంతో రెండు కిలోమీటర్లకు పైగా చుట్టూ తిరిగి ప్రయాణించాల్సి వస్తోందని ఆవేదన వ్యక్తం చేశారు. ముఖ్యంగా రాత్రి వేళల్లో పరిస్థితి మరింత క్లిష్టంగా మారుతోందని స్థానికులు చెబుతున్నారు. మహిళలు, వృద్ధులు, విద్యార్థులు, ఉద్యోగులు అత్యవసర అవసరాల కోసం బయటకు వెళ్లాల్సి వచ్చినప్పుడు తీవ్ర ఇబ్బందులు ఎదుర్కొంటున్నారని తెలిపారు. అంబులెన్స్, అగ్నిమాపక వాహనాలు వంటి అత్యవసర సేవలు కూడా సమయానికి చేరుకోవడం కష్టంగా మారే ప్రమాదం ఉందని ఆందోళన వ్యక్తం చేశారు. ప్రధాన రహదారి అందుబాటులో లేకపోవడంతో వర్షాకాలంలో మరింత సమస్యలు ఎదురవుతున్నాయని స్థానికులు పేర్కొన్నారు. అదనపు దూరం ప్రయాణించాల్సి రావడం వల్ల సమయం, ఇంధనం వృథా కావడంతో పాటు ప్రజలపై ఆర్థిక భారం కూడా పడుతోందని తెలిపారు. ఈ నేపథ్యంలో సమస్యను పరిశీలించి ప్రజల రాకపోకలకు ఎలాంటి ఆటంకం లేకుండా తగిన చర్యలు తీసుకోవాలని హైడ్రా కమిషనర్ రంగనాథ్‌కు వినతిపత్రం సమర్పించినట్లు స్థానికులు తెలిపారు. ప్రజల ఇబ్బందులను దృష్టిలో ఉంచుకుని రహదారి పునరుద్ధరణకు లేదా ప్రత్యామ్నాయ మార్గం ఏర్పాటుకు అధికారులు వెంటనే చర్యలు తీసుకోవాలని వారు కోరారు. ఈ అంశంపై సమగ్ర పరిశీలన జరిపి స్థానికులకు న్యాయం చేయాలని, నివాస ప్రాంత ప్రజల భద్రత, సౌకర్యాలను దృష్టిలో ఉంచుకుని శాశ్వత పరిష్కారం చూపాలని జీపీఆర్ లేఅవుట్ వాసులు విజ్ఞప్తి చేశారు.